1. Waa s' Gruuße will betrachde,
darf s' Kloone nidd ve-achde!
Drum schbitscht jetzt eier Maalche
for s' Lob uff unser Raalche.
Solang wie unser Ort besteht
unn sich am Torm de Gickel dreht,
gibt's Raalcher, wuu im Schdille
so manche Zweck erfille.
Refrain:
Jedes hott sei eiche Aart,
ob vorre orrer hinne,
unn es weer doch jammerschaäd,
deet oones nor veschwinne.
2. Kennt so e Raalche redde,
dann deht’s uns haat, ich wedde,
vunn veele alde Beele
die Liebschaft noch vezeehle.
Manch Pärche hodd sich schdill vegniecht
im Raalche an die Wand geschmiecht.
Selbscht Aamor konnt die Schbure
trotz Vollmond nie beluhre.
Refrain:
Jedes hott sei eiche Aart . . .
3. Kimmt dann baam Schoppetanke
e braave Mann ins Wanke,
dann iss e Raalche immer
sei letschde Hoffnungsschimmer,
doo fällt aar niemols uff die Saat,
unn wann ner uff fem Buckel laat,
dann kann ner ohne Miehe
die Richtung wärre kriehe.
Refrain:
Jedes hott sei eiche Aart . . . |
|
4. Es bascht dorch unser Raalche
koo Fuhrwerk unn koo Gaalche,
unn dicke Laad, die kenne
drin nidd ehr Hose wenne.
Unn trotzdem find’ an mancher Schdell
märr Naachtwächder, uff alle Fäll
vunn Bürcher unn Prolete
im Dunkele ausgetrete.
Refrain:
Jedes hott sei eiche Aart . . .
5. Wu gibt's dann sunscht noch Ecke,
for Abfäll se veschdecke?
Wu deere dann die Katze
sich naachts des Fell vekratze,
wann zwische Haaser, kraaz unn quer,
nidd ab unn zu e Raalche weer?
Drum loscht trotz Schutt unn Schärrwe
koo Raalche nidd vedärrwe!
Refrain:
Jedes hott sei eiche Aart . . .
Text: Jupp Dickescheid
© siehe Autorenliste |